Bases del concursu
Van poder presentase al premiu toles persones que lo deseyen, seya la que seya la so nacionalidá y edá, sacantes les que llograren el primer premiu na mesma modalidá/categoría d’hasta trés ediciones anteriores del Certame.
Nun puen participar persones que desempeñen cualquier mena de función o xera na Sociedá Cultural y Recreativa La Montera, incluyíos a estos efeutos los miembros del Xuráu o los sos familiares direutos en primer grau.
Establécense dos modalidaes: obres escrites n'asturianu y obres escrites en castellán. En caúna de les dos modalidaes, establécense dos categoríes: mayores d'edá y menores d'edá. Los menores que participen nesti premiu tienen qu’axuntar un documentu cola autorización del padre, madre, tutor o tutora llegal.
Namás se pue presentar un cuentu por modalidá. Sicasí, nengún participante va poder ser premiáu en más d'una modalidá/categoría y, nel supuestu que se presentare en delles y fuere merecedor de ser premiáu en más d’una, namás va otorgáse-y el premiu na modalidá y categoría con mayor dotación económica.
L’usu de ferramientes d’intelixencia artificial implica la descalificación automática del cuentu.
Les obres presentaes a esti Certame tienen de tar escrites n'asturianu o castellán y tienen de ser cuentos inéditos, non premiaos enantes nin suxetos a compromisu dalgunu d'edición. Magar que’l tema seya llibre, estimaráse que la obra seya espeyu de los valores que guiaron la vida del escritor de Les Cuestes.
Los rellatos van presentase en lletra Times News Roman, tamañu de fonte 12 a doble espaciu y marxes estándar (marxe derechu: 3; izquierdu: 2,5; superior 2; inferior: 2). El llargor mínimu de cada rellatu va ser de 600 (seiscientes) pallabres y el máximu de 3000 (trés mil). Los trabayos presentaos nun van llevar el nome del autor o autora, sinón que van ser roblaos con alcuñu.
Los orixinales van poder presentase de dos maneres:
PER CORRÉU POSTAL: van unviase trés copies perfectamente lleíbles, escrites a dos espacios per una sola cara, grapaes na parte cimera del so marxe izquierdu.
PER CORRÉU ELECTRÓNICU: han mandase dos archivos de Word a les señes de corréu electrónicu concursorelatos@lamontera.org. Nel asuntu va escribise: IV Certame Internacional de Cuentos Curtios “Mánfer de la Llera”. En cuerpu del corréu namás hai qu’escribir la llingua de la obra (asturianu/castellán) y la categoría a la que se presenta (menor d’edá/mayor d’edá). Han axuntase dos archivos Word. Ún ha incluyir el rellatu y tien que denomase col títulu d’ésti. El segundu ha incluyir los datos personales (títulu del cuentu, nome completu del autor/a, alcuñu, señes, corréu electrónicu y teléfonu de contactu) y tien que denomase col alcuñu del autor y el títulu del rellatu. Los menores d’edá han axuntar un tercer archivu cola autorización del padre, madre, tutor o tutora llegal.
- Premios: establécense los premios que s’especifiquen darréu y que tarán suxetos a la normativa fiscal vixente:
- PRIMER PREMIU ASTURIANU MAYOR D’EDÁ: 1.600€
- PRIMER PREMIU ASTURIANU MENOR D’EDÁ: 400€
- PRIMER PREMIU CASTELLÁN MAYOR D’EDÁ: 800€
PRIMER PREMIU CASTELLÁN MENOR D’EDÁ: 200€
Plazu: La receición d’orixinales va principiar el vienres 6 de febreru de 2026 y va quedar zarrada’l vienres 17 d’abril de 2026 a les 23:59 hores, tiempu d’Asturies (España). Van ser almitíos aquellos trabayos que tengan el matasellos d’orixe con fecha igual o anterior al 17 d’abril, si se remiten per corréu postal. A los participantes per corréu electrónicu encamiéntase-yos tar atentos a la diferencia horaria si manden el so trabayu dende otru usu horariu diferente al d’Asturies.
Va nomase un comité de llectura previo qu’ha esbillar les obres que van pasar depués a la consideración del Xuráu, que va tar integráu por personalidaes de les lletres y la cultura, amás de por un representante de la Xunta Direutiva de la Sociedá Cultural y Recreativa La Montera que va actuar como Secretariu con voz, pero ensin votu.
Cada trabayu tien d’axuntar un sobre zarráu que, per fuera, ha llevar escrito’l títulu del cuentu, alcuñu, modalidá (asturianu/castellán) y categoría a la que se presenta (mayor d’edá/menor d’edá) y per dientro los siguientes datos: títulu del rellatu y alcuñu, nome completu del autor o autora, señes, teléfonu y corréu electrónicu. Los menores d’edá han axuntar equí’l documentu d’autorización del padre, madre, tutor o tutora llegal. Too ello va unviase a les señes darréu:
SOCIEDAD CULTURAL Y RECREATIVA LA MONTERA
IV Certame Internacional de Cuentos Curtios “Mánfer de la Llera”
C/ Leopoldo Fernández Nespral, 29.
Llangréu 33930, Asturies (España)
- El Xuráu, que va emitir un fallu inapellatible, va tener la facultá de declarar desierta la concesión de los premios si, al so entender, los trabayos presentaos nun amuesen méritos abondos.
El fallu del Xuráu va anunciase la última selmana del mes de xunu de 2026 y la entrega de premios va coincidir cola selmana de les fiestes de Santiago en Sama (25 de xunetu) nun actu públicu cola presencia de los premiaos si son residentes n’Asturies. La non asistencia al actu ensin un motivu de fuerza mayor supón la renuncia al premiu. Los premiaos que nun vivan n’Asturies podrán asistir al actu o mandar per corréu electrónicu un videu d’agradecimientu.
Los rellatos premiaos van quedar en poder de la Sociedá Cultural y Recreativa La Montera, siendo de la mesma la titularidá de los derechos d'esplotación, pudiendo editalos o espublizalos al traviés de cualesquier mediu. L'usu discrecional de los cuentos premiaos nesti concursu per parte de los sos autores va quedar suxetu a l'autorización espresa de la Sociedá Cultural y Recreativa La Montera.
Amás, podrán editase los rellatos nuna publicación conxunta. Van poder ser incluyíos nesta edición, amás de los rellatos premiaos, aquellos que, pol so especial interés o calidá, considere'l Xuráu merecedores de ser incorporaos a dicha publicación. En tal casu, caún de los autores colos sos rellatos publicaos va recibir de baldre trés exemplares de la citada edición. Los derechos d'autor xeneraos pola publicación de la edición o reediciones de la obra premiada en volume conxunto, o ellaborada con escoyeta de los mesmos, van entendese compensaos col premiu otorgáu, polo que más allá d'esi casu, l'autor va cuntar cola plenitú del so exerciciu y derechu a publicación per otros calces.
Los trabayos non premiaos nun van devolvese, siendo destruyíos los mesmos cuando acabe’l concursu.
El fechu de participar nesti concursu implica l’aceptación de les sos Bases. La organización va resolver toles incidencies non previstes nestes Bases en beneficiu del concursu.
Va actuar de Secretariu del Xuráu don Lluis Aique Iglesias Fernández, vocal de Cultura de la Sociedá Cultural y Recreativa La Montera, que atenderá de tarde les consultes sobre’l procesu de participación nesti Certame nel teléfonu 654249547 y nes señes de corréu electrónicu organizacionconcurso@lamontera.org.
El fallu del Xuráu va comunicase personalmente a los ganadores per teléfonu. Los demás participantes van poder conocer el fallu del Xuráu na páxina web de La Montera y pelos medios de comunicación en xunetu.
