Hestoria

Entamu

La Sociedá La Montera ye una de les asociaciones  más antigües d'Asturies. Creada en Sama de Llangréu nel añu 1912, La Montera ufierta los sos servicios a los sos 3500 asociaos, col ánimu de fomentar Cultura, Deporte y Recréu.

A lo llargo d'esti sieglu La Montera foi un centru aglutinador y dinamizador de la vida social y cultural de tola Contorna. D'ente los sos socios salieron tamién fundadores, integrantes y impulsores de les principales entidaes de Llangréu, a les qu'acoyó en munchos casos como parte de si mesma. L'Atenéu Popular de Llangréu y la so Biblioteca Circulante, la Sociedá de Festejo «Santiago Apóstol», el Centru d'Iniciatives del Valle del Nalón,  la Sociedá Cultural «La Carbonera», el Racing Club Llangreanu, El Círculu Mercantil, l'Asociación de Capataces de Mines, la Sociedá Filarmónica de Llangréu o la Xunta Comarcal del Colexu de Médicos fueron dalguna d'elles.

Desque Gumersindo del Valle fuera escoyíu como primer presidente, la sociedá tuvo una actividá social y cultural siguida, y desque en 1922, inaugurárase l'actual see, fueron innumberables los músicos, escritores, pintores, políticos, deportistes y demás personalidaes de sonadía que pasaron polos sos salones. Valle-Inclán, Pérez de Ayala, Miguel de Unamuno, Eduardo Torner, Aurelio del Llanu, Joaquín Rodrigo, Alfonso Camín, Gerardo Diego, José Fierro, Narcisu Yepes, Gonzalo Riega Ballester, S.A.R Alfonso de Borbón y Battenberg, Ataúlfo Argenta o Ramón Tamames, ente otros.

En 1973 la sociedá amplió la so ufierta construyendo unes instalaciones deportives nos terrenes de Los Llerones, que cunten con piscines, zona verde y canches deportives.